कामगार युनियन, कृतिसमिती व सर्व कामगारांच्या उपस्थितीत घेण्यात आला निर्णय.
अहमदनगर - राहुरी तालुक्याची कामधेनू समजल्या जाणाऱ्या डॉ.बाबुराव बापुजी तनपुरे साखर कारखान्यावर जिल्हा बँकेने कर्जाच्या वसुलीसाठी जप्तीची कार्यवाही केल्याने कामगार वर्गातून तीव्र भावना व्यक्त होत असून आज कारखाना कार्यस्थळावरील लक्ष्मीनारायण मंदिराच्या आवारात कामगार युनियन कृती समिती व सर्व कामगारांच्या उपस्थितीत बैठक पार पडली.
या बैठकित कारखाना व्यवस्थापन व जिल्हा बँकेला मागण्यांचे निवेदन देण्यात येणार असून १२ दिवसांच्या आत कुठलाही ठोस निर्णय न झाल्यास जन आंदोलन उभारण्याचा इशारा यावेळी देण्यात आला.
डॉ.तनपुरे साखर कारखान्याकडून कर्जाची परतफेड न झाल्याने व पुनर्गठन कराराचा भंग केल्याने जिल्हा बँकेने शनिवारी कारखाना सिल केला. या कारवाईने कामगार वर्गात एकच खळबळ उडाली.
दरम्यान आज सकाळी लक्ष्मीनारायण मंदिरात साखर कामगार युनियन, कारखाना कृती समितीची संयुक्त बैठक पार पडली. या बैठकीला कायम कामगार, मजूर हजरी, संकलित तसेच सेवानिवृत्त कामगार मोठ्या संख्यने उपस्थित होते.
यावेळी सचिन काळे, सुरेश थोरात, चंद्रकांत कराळे, अर्जुन दुशिंग यांनी भूमिका मांडली.
तर युनियनचे माजी अध्यक्ष इंद्रभान पेरणे यांनी आपल्या कष्टाचे पैसे मिळाले पाहिजे. आज आपल्या जीवन मरणाचा प्रश्न निर्माण झाला आहे.
सत्ताधारी व्यवस्थानाच्या काळातील सर्व थकीत पगार मिळावे व ले ऑफ बाबत व्यवस्थापनाची भूमिका स्पष्ट होणे अपेक्षित असून कारखाना व्यवस्थापन व जिल्हा बँकेला निवेदन देण्यात येणार असून मागण्यांचा विचार झाला नाही तर तीव्र जनआंदोलन उभारणार असल्याचा इशारा देण्यात आला.
पेरणे यांच्या जनआंदोलनाच्या भूमिकेस कामगार बांधवांनी हात उंचावून प्रतिसाद दिला.
आम्ही सर्व कामगार आंदोलनात सक्रिय राहू अशी शपथ लक्ष्मीनारायण देवताच्या साक्षीने घेण्यात आली.
यावेळी युनियनचे अध्यक्ष गजानन निमसे, सीताराम नालकर, बाळासाहेब तारडे, ईश्र्वर दुधे, राजेंद्र गागरे आदिंसह कामगार उपस्थित होते.
0 Comments